قصة خارطة الحب
"الموبيل بيرن، بيرن، بيرن، بيرن، كمان مره يرن" فتح عيونه ومش قادر يرد علي اللى بيتصل..
فضل يرن لحد ما مسكه و رد وقال بصوت يخوف
، مين؟؟؟
قالت أنا ياجزمه.. إنت لسه نايم لحد دلوقتي؟ قوم يلا عشان ورانا مشوار قولتلها مش مشوار ايه؟ قالت مش قولت هنزل معاك نشترى ليك لبس؟ نسيت؟
اه اه افتكرت طيب حاضر هقوم اهو قالتلي بقولك ايه صور نفسك صوره دلوقتي و ابعتها يلا و انت نايم على السرير بشعرك المنكوش يلا عاوزه اشوفك؟؟..
قولتلها انتي بتستهبلي؟ قالتلي يلا عشان خطري صورة واحده بس؟ قولتلها حاضر خليكي معايا مسكت الموبيل اتصورت و بعت ليها الصوره فى وقتها..
قالت "مين ده؟ إنت مين؟" قلتلها هقولك كلمه تزعلك،
فضلت تضحك وقالت بهزر معاك بس شكلك حلو والله و انت لسه صاحي وشعرك منكوش مالوش اتجاه معين ...قالت يلا قوم البس نص ساعه و هعدي عليك قولتلها طيب وقفلت، قعدت ع السرير وبعدين روحت ع الحمام وقفت قدام المرايه ابص لنفسى واقول اتفو عليك ..
الجرس بيرن، امى فتحت طلعت هي امي قالتلها تعالي البيه لس صاحي قالتلها معلش ياطنط بقي هنعمل ايه الرجاله كلهم كده خاينين امى قالت اه والله
قولتلهم و ده ايه علاقته بالنوم مش فاهم؟ ايه اللى دخل الخيانه في النوم؟ قالو ماهو كله متعلق ببعضه، امي دخلت المطبخ
وهي فضلت قاعده معايا ..قالتلي ايه رايك في لبسى كده؟؟ قولتلها حلو شغال، قالت بطل غلاسه هو حلو كده؟ اصل كنت محتاره البس البنطلون ده ولا التاني مش عارفه بصراحه .
.
قولت فى بالى "هتبداء تحكيلي عن اللي فى الدولاب" قومي يابت يلا ننزل.. فتحت الباب و نزلنا و احنا نازلين علي السلالم قالتلي بقولك........
"قبل 6 سنين" فى المدرسه في حصه العربى، قولت لو سمحت حد معاه قلم زياده؟ لقيت بنت قالت خد قلم اهو حدفتلي القلم جه في عيني كان هيشيليها وبعد الحصه جاتلي قالتلي اسفه والله مكنش قصدي انا حدفت القلم بكل رقه، قولتلها رقه؟ قالت يعنى براحه قولتلها ولو جامد هيعدي من راسى مثلا؟ ...
قالت مش قاصده بقي يابرنس عدي الموضوع
قولتلها برنس؟ انتي قاعده على قهوه؟ قالت فكك بقي قولي انا بشوفك ديما معدي من قدام عمارتنا صح؟
قولتلها منا ساكن وراكم اصلا فالعماره اللى وراكم قالت اه عشان كده وبقينا كل يوم طريقنا واحد انزل من البيت اعدي عليها اخدها المدرسه معايا
امها عرفتني لان هي البنت الوحيده
و امها لقت حد يكون معاها يروح معاها ويجيبها وهي مطمنه و بقيت حاسس إن امها امي و العكس هى نفس الكلام ..و تصحيني من النوم عشان نروح المدرسه مع بعض، و احنا شايلين الشنط و كمان واحنا راجعين جايبين شيبسي كبير
بناكل فيه سوا نتسلي في الطريق
يابت ارحميني بقي مش كل شويا نوقف عند محل و نبص على اللبس قالتلي يابنى اش فهمك انت في اللبس
دي اذواق ياحمار، قولتلها بصي من الاخر ...إللي افهمه فى البنات حاجات فوق الحاجات وفوقها شوية حاجات، قالتلي حاسك بتقل ادبك؟ قولتلها حساني؟ لا انا فعلا بقل ادبى قالتلى اخرس ياجزمه
قولتلها بطلي شتيمه عشان مخبطكيش قلمين؟ قالت والله اقول بيتحرش بيا؟ قولتلها قولى كده والله هيجوا يتحرشوا معايا الناس تعبانه اصلا
قولتلها شوفتي البنت اللى قاعده في اول الفصل دي عماله تبصلي ازاي؟ رقبتها اتلوحت من كتر ماهي بتبص ليا قالت اه حاسه انها بتحبك وبتغمزلى
قولتلها بتغمزي ليه؟ قالت بغمز يعنى "تك تك" كده يعنى
ايوة ياعم قولتلها بطلي يابت الحركات دي قالتلي متاخد تشيل شنطتي كتفي وجعني اوى
قولتلها هاتي وشلتها وفي يوم عديت عليها لقيتها زعلانه ومضايقه عشان ابوها هيتجوز علي امها وامها بتعيط قولتلها يلا البسى هدومك عشان هنخرج أنا استأذنت من ماما ووافقت وبعد ما دخلتاوضتها كلمت امها وهي بتغير هدومها قولتلهامعلش ياطنط اسمحيلي اخدها امشيها شويا عشان تفك عن نفسها قالت ماشى و على ما طلعت من الاوضه اخدتها و نزلنا نتمشي شويه و احنا ماشيين عماله تحكيلي قد ايه اتصدمت في ابوها و انه هيتجوز علي امها
و إن الرجله كلهم خاينين و عنيهم زايغه ومهما الواحده عملت ليهم عمرهم ما بيقدرو ده و بيبصوا لبرا
و عمرهم ما هيقددرو اي واحده بتحبهم
قولتلها خلي بالك في راجل جنبك قالت فين ده؟
قولتلها امال انا ايه بنسبالك؟ قاله اه معلش مخدتش بالي قولتلها والله؟ قالت خلاص بقي متكبرهاش و بعدها قولتلها استني هنا عديت الشارع جيبت ايسكريم فانيليه ليا وليها شكولاته قولتلها عارف انك بتحبي بالشكولاته فرحت شويه حاولت افكها ..
قولتلها عندي فكره حلوه مش احنا مش بنقرف من بعض؟ قالت اه؟ قولتلها نغير انا وانتي كل شويا ايه رايك حلوه ؟ لحسه هنا و لحسه هنا نغير الطعم؟ عني انتي تدوقي الفانيليه وانا ادوق الشكولاته
و ونفضل نغير في طعم الاتنين قولتي ايه؟ قالت ماشى موافقه كل شويا اديها بتاعتي واخد بتاعتها واحنا ماشين قالت حلوه الفانيليه و برده الشكولاته قولتلها خدي بتاعتي كمليها وعماله تاكل في الاتنين بطفاسه قولتلها مالك يابنتى كلي براحه قالتلي مضايقه قولتلها
وهو انتي عشان مضايقه.. تاكلي كده قالتلي واكتر كمان سبيني اطلع اللي جوايا، قولتلها طلعي... شكله هيطلع عليا انا قالتلي مضايقه
قولتلها وهو انتي عشان مضايقه.. تاكلي كده قالتلي واكتر كمان سبيني اطلع اللي جوايا، قولتلها طلعي... شكله هيطلع عليا انا وبعدها قولتلها ايه رايك ندخل الملاهي؟
قالت ماشي دخلنا الملاهي و ركبتها مرجيحه و قعدت ازق فيها بلف وشي كده ما مختش بالى انها راجعه عليا ...قالتلي حاسب ببص لقيتها خدتني و وقعنا على الارض وفضلت تضحك قولتلها اهو ده اللى باخده منك؟ بس ضحكتك حلوه بس متضحكيش تاني كده خالص خالص
قولتلها عشان ضحكتك بدرجات وكلهم حلوين
و اول درجه ابتسامه ثم ضحكه ثم رقصني ياجدع فبلاش رقصني ياجدع دي عشان محدش يفهمك ويفهمني غلط
قالتلي كفايا انت فاهمني، ابتسمتلها وقولتلها عندك حقك اضحكي زى مانتي عاوزه وبعدها روحنا قعدنا شويا في مكان انا وهي وقولتلها
مش عاوز اشوفك بتبكي مهما حصل، مفيش حاجه
تخليكي تكشرى و تزعلي انسي الزعل و عيشي حياتك اكن النهاره هو اخر يوم ليكي فى الدنيا قالتلي فاهمه بس انا حزينه على ماما فضلت عايشه مع بابا كتير وفي الاخر هيتجوز عليها ومهموش اخلصها ولا حبها ليه خالص وهيتجوز عليها قولتلها
مش كل الرجاله مش كويسين فيهم المخلص و اللي بيحب بجد و فيهم اللي مش بيقدر و متحكميش على الكل عشان شوفتي حاله او اتنين منهم فيهم ناس حلوه تعرف انا هقفل قلبى ده و مش هدخل
حد فيه لحد ما الاقي الشخص اللى يستحقه بجد، وقتها بقي معنديش مانع احبه لكن مرميش نفسى لاي حد كده و خلاص
بصيتلها وسكت شويا...
قولتلها طيب حقك طبعا انك تقفلي قلبك بس بصي حواليكي هتلاقي كتير بيحبوكي من زمان و انتى مش حاسه بده فهمانى؟ قالتلي صح بس مش دلوقتي، قولتلها طبعا حقك ودي حياتك قالتلي تعرف انت احلي حاجه في حياتي صحبى و اخويا و كمان ربنا عوضني بيك في حاجات كتيرحطيت رجل علي رجل وتخنت صوتي و قولتلها " احم ايوة ايوة يابنتي" قالتلي انت هتسوق فيها قولتلها سبيني اعيش اللحظهايه اللى مضايقك في كده؟
قالتلي تعرف انت لو بس بطلت السجاير هتبقي كويس اوي و تبطل تمشى مع شوية الشباب اللى تعرفهم دول قولتلها بس كده من عنيا يا برنس الضحكه؟ طلعت علبة السجاير و قولتلها خديها ارميها
قالتلى طب و الولاعه؟ قولتلها لاء الولاعه لا اصلها عزيزه عليا، قالت هات الولاعه وبطل دلع هاااات و رمتها في الزباله
وبعدها كملنا مشى انا وهي لحد ما وصلتها بيتها و طلعت معاها سلمتها لأمها وبعدها طلبت اتكلم مه امها انا وهي لوحدنا...
و قولتلها بصي ياطنط انا زي ابنك
و مش زي كمان لاء انا ابنك و بحبك و ربنا عالم باللي فى القلوب بس مش عاوزك تضايقي و لا تزعلي
أنا اسف اني بتدخل في حاجات مش ليا و مش من حقي بس انا لو ادخلت هبقي بدخل عشان خاطر بنتك و عشانك عشان بحبكم وحاسك امي و هي اختى ...قالتليى أختك؟ قولتلها مش اختي اوى يعني، ياطنط متغيريش الموضوع المهم أنا مستعد اعمل اي حاجه عشان ارجعلكو راجلكم قالت طب تعالي
وعرفت مين الست دي و ساكنه فين و بمعرفتي بناس
سكانين قريب منهم عرفت إنها كانت ليها علاقه مع واحد جارهم و اتمسكت معاها و بعدها اطلقت عرفت اجمع شوية عملومات عنها و بعدها عرفت امها وقالت يانهار اسود كل ده؟ عاوز يتجوز واحده زباله؟ عاوز يفضحنا وسط الناس بواحده زي دى؟ )
قولتلها غالباً يا طنط هي عاوزه تتجوز اي حد يلبسها
من الاخر بس في حل اكيد قالت كفايه كده انا هكلمه قولتلها لاء ياطنط بلاش تيجيى منك انتي كتبتله ورقه بكل تفاصيل حياتها و ادتهاله بطريقه حلوه هبعتها في البوسطه عن طريق بوسطجي عادي قالت طيب تمام، و عملتها و اخد الجواب و اقراه وبعدها بفتره سابها بعد ماتأكد إنه كان هيتجوز واحده سمعتها وحشة ومفضوحة ف المنطقة كلها
و شال فكرة الجواز دي ولما روحت ليهم بيتهم وابوهم مش موجود امها قالت الواد المشكله ده هو السبب
في ان ابوكي يشيل فكره الجواز من دماغه لقيتها جريت عليا و حضنتني قدام امها ردة فعل ليها غير متوقعه وامها اتفاجأت بس قدرت فرحتها كنت رافع ايدي لفوق زى الحرامي الممسوك و فضلت تعيط وتضحك وقالتلي انا بحبك اوي امها بصتلي و ابتسمت قولتلها و انا كمان، وبقيت انا بالنسبالها راجلها و ضهرها و سندها فى الدنيا كانت لما تضايق تجرى تتصل عليا
و انا افضل جنبها اتشقلبلها لحد
ما اشوف ضحكتها و افضل اتوه في المواضيع عشان تنسى الزعل
كنت ديما واقف وراها عشان لما تقع الحقها، و امسح دموعها بهدومي و أديا، و اخدها في حضنى بالكلام، و اسمع صوت ضحكتها و اطمن عليها
كنت لما اشوفها بتضحك كنت بضحك، لما تكشر اكشر ، ولما تحب تجنن تلاقي اللى واقف جنبها اصلا مجنون، كنت
بعمل كل حاجه ترضيها و تفرحها كنت لما اشوفها بتضحك كنت بضحك، لما تكشر اكشر ، ولما تحب تجنن تلاقي اللى واقف جنبها اصلا مجنون، كنت بعمل كل حاجه ترضيها و تفرحها كانت تفضل تبعت ليا فى صورها
و هي بكل حالتها و هي لسه صاحيه وهي هتنام و هي بتاكل و هي بتذاكر، كنت انا بضحك و مبسوط بيها و فرحان بهبلها
كانت مشكلتي إنها عارفه عني كل حاجه كل مصايبي
، كل اللى بعمله صح او غلط، "حفظاني، فهماني" عارفه امتى بفرح و امتي بزعل عارفه تفاصيل ملامحي .
كنا عباره عن اي حاجه وتقسمت نصين حاجه
عمرها ما هتكمل إلا بوجود الاتنين مع بعض،حاجه لو نص فيها افترق النص التاني يموت، لازم يكونو مع بعض .
كنا بنكمل بعض في كل حاجه مينفعش اضحك لوحدي،
منفعش ازعل لوحدي، مينفعش اتجنن لوحدي، مينفعش اعمل اى حاجه لوحدي لازم تكون معايا وملزماني..
وكبرنا و احنا مع بعض لحد ما دخلنا
حتي نفس الكليه مع بعض عمرها ما قالت بحبك و لا عمري قولتلها لكن بنحسها في عيونها لما نبص في عيون بعض
تفاصيلنا واحده، ضحكتنا واحده، كل حاجه فينا واحده،
حاجه من المستحيل تتكرر و لا تحصل في زمنا، قلب واحد عقل واحد حتي الاحساس واحد.. لما تخرج مينفعش تخرج غير معايا
و لما تضحك مينفعش تضحك غير معايا، كل حاجه معايا، مينفعش اصلا تعمل حاجه الا وهي معايا ...
ندخل المحاضرات مع بعض، نقعد جنب بعض، نكتب ورا الدكتور شويه هي تكتب و شويا انا اكتب، كان اللى يتعب يرتاح و التاني يكتب مكانه، مكملين بعض
كان كل ماحد يحاول يقرب منها كنت ببعده عنها،
كنت شايفها ورده وسط بستان مليان شوك وأنا بحميها من اي حاجه تأذيها او تزعلها، بخاف عليها ولما اشوفها و اقفه بتكلم واحد الاقيها جايه بتقولي ده واحد قريب واحده زميلتنا متخفش
، هو مش بيحبني لانه اصلا خاطب متخفش ريح نفسك..
كانت عارفه إن انا مش هقولها مين ده؟
كانت حاسه بيا و فهماني و عارفه إن انا مش هتكلم، هستناها هي اللى تيجي تحكيلي و تتكلم وتحكي كل حاجه
ولما نمشى و نركب المواصلات، كتفها ان لامس كتفي و رجليها لامسه رجلي سامع صوت ضربات قلبها من أنفاسها، فاهم بتفكر في ايه من غير ما تتكلم
كنت حتي مش عاوز اتعبها حتي في اشيل الكتب وبشيلها أنا، كنت بحبها بطريقه فيها خوف طريقه فيها طيبه و حنيه كانت تقولى تعرف إنت احسن من بابا !
اقولها احسن من ابوكي؟
تقولي ايوه انت حنين اوي ومش بتزعلني منك و ديما بتعمل كل حاجه حلوه تفرحني و عمرى ما حسيت منك بقسوه بالعكس
بالعكس لما اغلط بتناقشني بهدوء من غير ما تزعقلي،
صحيح ساعات صوتك بيعلي بس بفهم لانك خايف عليا من الغلط عاوزني ديما اكون صح و ده عاجبني
و في يوم و احنا ماشيين جنب بعض قالتلي متقعدش
جنب العيال اللى كنت قاعد معاهم بيشربو حشيش و انت شكلك شربت انت مش عارف تمشى اصلا قولتلها مشربتش قالت لاء انت مش مظبوط فضلت اقول ان انا فايق ومشربتش لحد ما احنا ماشيين وقربنا على بيتها شارع 200 متر وتبقي قدام العماره
قالتلي ايه اللى الحاجات اللي نفسك تلاقيها في اللى تتجوزها؟ قولتلها تكون زيك، قالتلي بتكلم بجد قولتلها وانا بتكلم بجد تكون زيك
قولتلها وانتي بقي؟ قالت يكون زيك بظبط، قولتلها خلاص نتجوز ونخلص؟ قالت بس ياغبي هو في حد بيتجوز اخته،
وبتضحك هى بتقول " اخته"؟؟
لما سمعت الكلمه كنت حاسس زي ما يكون الجو برد و حد جاب جردل مايه وحطو فوقى، قولتلها اخته؟ قالت طبعا يابنى مفيش حد بيتجوز اخته
قولتلها اخته ازاي يعني؟ بعد كل السنين دي تقولي
ليا اخته انتي مش بتحبيني زى ما بحبك ولا ايه؟ قالتلي وهو انا قولتلك بحبك؟ ها قول ؟
قلتلها ايوه قولتي لما رجعت ابوكي ليكى و حضنتينى قالتلي ده كان زمان انا كنت بقولك بحبك زي اخويا عشان فرحتني ان بابا رجع لينا من تانى
وبعدين انت بتهزر صح؟ قولتلها انا شكلى اتسطلت فعلاً، قالت مش قولتلك شربت قولتلها اه شربت حشيش قالت وكدبت عليا ليه وقاعد تقولى مشربتش؟ ..قولتلها وهو انا بالسنبالك اخوكي؟ قالت لاء انت " ابويا وصحبى و اخويا " قولتلها بس؟ قالت طبعا هي دي حاجه قليله اصلا قولتلها اه عندك حق
طلعت بيتها وصلتها لأمها و قفلت الباب و انا نازل على السلالم رجلي مش قادره تشيلنيى قعدت على السلم مش قادر اقوم
اقف عشان اكمل للبيت عاوز حد يشيلنى يحطني على سريري، فضلت اخد في نفسي عشان اقدر اقوم و اكمل مشي ، حاولت اقوم و بقوم بالعافيه زي المشلول بيسند ع اي حاجه فضلت امشى
لحد ما وصلت البيت امى بتقولي مالك؟ قولتلها مفيش دخلت رزعت باب الاوضه و قعدت على الارض ساند راسي على السرير
مش مستوعب اللي حصل لدرجه إني وهمت نفسي ان فعلاً شربت حشيش و دخلت غسلت وشى مكتفيتش بكده وقفت تحت الدوش بهدومي عشان افوق من اللي انا فيه
طلعت من الحمام اتصلت بيها عشان اتأكد قالتليى نفس الكلام توهتها في الكلام واعتذرت اكني كنت مسطول
وقفلت معاها رجعت قعد ع الارض من تاني ...فردت جسمي كله علي الارض و نمت لقيت امي بتصحيني و بتقولي انت نايم على الارض ليه؟ انت كنت بتعيط و انت نايم انا دخلت على صوتك اصلا
قولتلها بعيط وانا نايم؟ قالت اه يابنى، انت زعلت معاها؟ قولتلها مع مين؟ قالت هو في غيرها؟ قولتلها لاء مزعلتش مفيش انا بس تعبان ...لقيت 20 مكالمه من امها مسكت الموبيل و اتصلت عليها قالتلي امها تعالي عاوزك دلوقتي لبست هدومي و روحتلها ودخلت قعدت معاها لوحدنا
حاجه حصلت قالتلي بنتى قالتلي اللى حصل، قولتلها انا مكنش قصدي حاجه انا فعلاً زي اخوها مفيش حاجه قالتلي هتكدب عليا؟ زي اخوها؟ كل ده واخوها ؟
دي لو كان ليها اخ بجد مكنش هيعمل زي ما بتعمل معاها كده انا فهماك كويس، مقدرتش امسك نفسي و بكيت قدامها قربت مني وحطت ايدها على راسي بتقولي متعيطش قولتلها انا بحبها اوي مكنتش متخيل انها في يوم هتقولي الكلمه دي انا عمرى ما زعلتها قالتلي غلطتك انك مقولتش ليها انك بتحبها وهو كان المفروض اقول ده كان باين انتى مكنتيش حاسه؟ قالت حاسه و فاهمه بس برضه انت متكلمتش وهي اخدتك على انك اخوها من تصرفاتك معاها
ولإنها البنت الوحيده و معندهاش اخ كبير او زيك يحبها كده، فعوضت الحرمان ده فيك من غير ماهي تقصد، و ده غصب عنها
صدقني بس جات فيك يابنى أنا عمرى ما زعلتها بالعكس بعمل كل حاجه نفسها فيها، عمرى ما جيت عليها و لا عليت صوتي
ديما كنت بفرحها عشان بحبها بجد من جويا
كنت بتشقلب عشان متحسش بالزعل من اي اتجاه
، كنت بحافظ ديما علي ملامح وشها بحافظ علي ضحكتها ، بحافظ علي ابتسامتها تفضل مرسومه .....أنا مغلطتش، أنا بحبها،
هو انا عشان مقولتش ليها بحبك يبقي مش بحبها دي باينه من تصرفاتي كل اللى حواليا حسوها إلا هي؟ طب ازاي بس افهم؟؟؟
قالتلي مش انت بتحبها؟ قولتلها اه قالتلي خلاص خليك
جنبها حتي لو زي اخوها انا مش عاوزها تخسرك لإنها مش هتقابل زيك مهما قابلت من ناس رجعت البيت قعدت على السرير
افكر في كل حاجه حصلت ما بينا من أول ما شوفنا بعض لحد دلوقتي، قاعد بفتكر كل لحظه حلوه ما بينا حصلت
يعنى كل إحساسي إنها بتحبني مش حقيقه؟ يعنى كل اللى عملته ليها كان بالنسبالها عادي؟ كل ضحكه كل موقف كل لحظه كانت بالنسبالها عادي ؟
هو انا عشان مقولتش ليها بحبك يبقي مش بحبها دي باينه من تصرفاتي كل اللى حواليا حسوها إلا هي؟ طب ازاي بس افهم؟؟؟
قالتلي مش انت بتحبها؟ قولتلها اه قالتلي خلاص خليك
جنبها حتي لو زي اخوها انا مش عاوزها تخسرك لإنها مش هتقابل زيك مهما قابلت من ناس رجعت البيت قعدت على السرير
افكر في كل حاجه حصلت ما بينا من أول ما شوفنا بعض لحد دلوقتي، قاعد بفتكر كل لحظه حلوه ما بينا حصلت
يعنى كل إحساسي إنها بتحبني مش حقيقه؟ يعنى كل اللى عملته ليها كان بالنسبالها عادي؟ كل ضحكه كل موقف كل لحظه كانت بالنسبالها عادي ؟
- أنا كنت بكل ما فيا من حب ليها كان عادي؟
- طب أنا فين من حياتها؟ مرحله و هتعدي؟ يعنى كل الاحلام اللى حلمتها مكانتش حقيقه كان خيال، وهم؟
- دموعي نزلت رغم كبريائي ، نزلت من غير ما حس بيها،
- نزلت علي واحده كنت شايفها كل حاجه حلوه في حياتي، بحبها ومش قادر ابعد عنها
- انا حياتي من غيرها مستحيله هي "صحبي، صحبتي، اختي، اخويا، امي، حبيبتي" ازاي هشوفها مع غيري بعد ما كانت معايا مش هقدر استحمل
يعنى أنا،، أنا فتره في حياتها؟ أنا؟..
- طب ليه؟ ليه مكونش أنا حبيبها؟ ده.. ده أنا عملت كل حاجه تفرحها، هو في بنت تلاقي شخص كده و تسيبه؟ ...
- قادر مش،، حاسس بالوقت مش سامع غير صوت عقارب الساعه و هي بتعد الدقيقه واحده واحده، مش حاسس بأي حاجه جوايا، دماغي مبتفكرش غير فيها ..سهران افتكر فيها، بفكر في كل لحظه حلوه عشناها، بفكر ازاي هستحمل بعدها، ازاي هستحمل اشوفها مع غيري، هو أنا قلبي ده ليه ميكونش حجر؟
- فضلت قاعد ابكي علي حالي، أبكي علي كل لحظه حلوه، كل إحساس حسيته منها كان غلط، فضلت ابكي علي الوهم اللى عيشته وصدقته واقنعت نفسي بيه ..روحت فردت جسمي علي سريرى
و حاسس بالبرد، حاسس إن الاوضه بتضيق اكتير عليا حاسس بإن نفسي هيطلع من جسمي لحد ما روحت في النوم
بقيت بهرب من اللي عايشه بالنوم، بهرب من الواقع اللي كرهني في كل حاجه حلوه، بحاول اعيش معاها في خيالي و انسى إن الواقع اصلا مش موجود
قررت أعمل اللي عليا أحبها حتي لو مش ليا،
يمكن تحس بيا، يمكن تفوق و تفهم إن اللى بيحبها "أنا مش حد تاني" يارتيها تحس و تفهمني ياريت... "مع مرور الايأم"
كنت متفق انها هتيجى تشتري معايا لبس لإن متعود تختارلى
كل حاجه البسها كنت بلبس إللي بتختاره ليا حتي لو مش مقتنع بيه
فضلت تتصل علي الموبيل لحد ما صحيت من النوم وصورتلها نفسي وانا لسه صاحي لإن كنا متفقين إن اول ما نصحي نصور نفسنا لبعض و نبعت صورنا
جاتلي البيت ودخلت وقعدت تحكيلي عن لبسها
و قولتلها يلا يابت ننزل عشان منتأخرش والحق اروحك و احنا نازلين علي السلالم قالتلي بقولك.....
- في واحد يعرف واحده صحبتي كان بيبص ليا من بعيد كده ديما، قال لصحبتي إنه بيحبني، قولتلها و إنتي رايك ايه؟ قالت بصراحه حاسه بحاجه حلوه أخدت نفس طويل و قولتلها طيب تمام،،،
- قالتلي ايه مقولتش رايك؟ قولتلها مش قولتي انك حاسه بحاجه حلوه؟ قالت اه قولتلها خلاص اللى تشوفيه..قالتلي يعنى ايه رايك
- عشان رايك مهم؟ قولتلها حاسه إنه هيسعدك؟
- قالت بص هو واد شكله وسيم ونضيف كده حتي ذوقه حلو فى لبسه بيعرف يختار كنت برد على كل كلمه بتقولها جوايا ،
- كل حرف عليه رد جوايا بس مقدرش اقوله لخسرها مقدرش احكي مقدرش افتح معاها كلام في حاجه منتهيه ...
- أنا لو كنت بخليكي انتي تختاري لبسي
- و تختاري كل حاجه علي ذوقك فده مالوش غير معني واحد
" إني فعلاً بحبك" مش عشان مبعرفش اختار او غيره
وهي بتقول حتي كمان البنات هتموت عليه،
تخيل بقي ابقي انا اللى بيحبها، قولتلها اه صح حاجه حلوه فعلاً.. قالت بس انت رايك فيه ايه ؟ قولتلها أنا معرفوش عشان احكم عليه قالت يعني نظرتك ايه؟ قولتلها شكله كويس، قالت طيب خلاص اصله قال لصحبتي لو كده هيكلمني بكرا فى الكليه ..
قولتلها طيب كويس وانا مطلوب مني اول ما يجي
ابعد عشان تعرفوا تتكلموا مش كده؟ قالت "لاء،، اممم بص مش عارف بصراحه إنت ادرى بقي هههه
قولتلها اه طيب ، وانا بنشتري اللبس
كانت كل ما تختار ليا حاجه اقول لاء مش عجباني، كنت بعارضها على اي حاجه بتختارها ليا وكانت مستغربه
يابني اي حاجه اختارهالك تقول لاء؟ قولتليها سبيني انا المره دي اختار لنفسي واخترت لبس و اشتريته قالت القميص ده مش حلو، قولتلها عاجبني..
و خرجنا ماشيين جنب بعض بتقولي عاوزه اكل ايسكريم زي زمان، قولتلها حاضر جيبتلها شكولاته و جبتلي الفانيليه و ماشين جنب بعض
قالت ايه مش هنعمل زي زمان نعكس الايسكريم؟ قولتلها مالوش لازمه خدي بتاعتي انا مش عاوزها، قالت مالك بس زعلان من ايه انا عملت ايه ؟
قولتلها مفيش حاجه انا بس
مضايق في حوار فى البيت كده حصل قالت طب ما تقول؟ قولتلها لاء مش عاوز انكد عليكي انتى بكرا وراكي حاجه حلوه
قالت تعرف أنا حاسه انه كويس ده غير كمان انه معروف وكده فاهم، قولتلها اه فاهم، فاهم كويس.. كنت باخد النفس جوايا بصعوبه كل حاجه بقت صعبه قالتلي بص بقي عاوزه منك خدمه هقعدك معاه
عشان تعرفه يتعامل معايا ازاي، عشان فعلا لازم يتعلم منك كتير، يتعلم ازاي يفرحني يخلينى مبسوطه قولتلها حاضر،،، وتاني يوم اتصلت بيا قالتلي انت فين قولتلها في الكليه قالت ازاي دى اول مره تروح لوحدك؟
قولتلها معلش صحيت بدرى بقي قالت طيب خلاص استناني، واستنيتها لحد ما جت و خلصنا المحاضرات،
لقيته جاي عليها من بعيد بيبص ليها و مبتسم و هي عامله نفسها مكسوفه
وانا حطيت وشى فى الارض،، لحد ما جه و وقف وسلم عليا وعليها وبعدها بصيت ليها و أنا جوايا مكسور.. قولت طيب
انا هروح اشوف اصحابي فين بقي
وحطيت ايدي في جيوبي وماشي مديهم ضهري و رقبتي غصب عني رافضه وبتلف تبص عليها، روحت قعدت
بعيد عنهم ببص عليهم و هما بيتكلموا
قاعد ابص عليها و عليه، ببص علي خسارتي و حسرتي ببص علي خيبة أملي و ببتسم أبتسامه حزن، وفضلت ابص عليهم من بعيد لحد ماخلصوا كلام.
كنت خايف يمسك ايدها وهو بيكلمها، او يقرب كتفه من كتفها او تضحكله زي ما كانت بتضحكلي، خايف تحصل اي حاجه
كانت بتحصل معاها ومعايا، خايف ومشي وسابها... ببص عليه ازاي يديلها ضهره وهو ماشي إنت استحاله تكون بتحبها زيي،، روحتلها قولتلها خلاص؟ قالت اه أنا مبسوطه اوى
فضل يقولي انه بيحبني من زمان و بيراقبني وسألني عنك كان غيران منك اصله ميعرفش حاجه قولت جوايا "فعلاً لا إنتى ولا هو تعرفوا اى حاجه"
قولتلها وبعدين؟ قالت قولتله انك زي اخويا من زمان كل الفرق بس الاسماء، قولتلها وقالك ايه؟ قالت اخد رقمي و هيكلمني على بليل كده
لما وصلتها اتصلت بأمها حكيت ليها اللى حصل
قالت طب و إنت سكت ليه؟لما وصلتها اتصلت بأمها حكيت ليها اللى حصل قالت طب و إنت سكت ليه؟
قولتلها عاوز اطلب منك طلب لو بتحبني بجد وشيفانيى ابنك تعمليه
عاوزك تسبيها تاخد راحتها و تتكلم معاه عاوزها تجرب وتعمل علاقات وتشوف يمكن تعقل و تعرف الفرق وتفهم مين بيحبها بجد ومين لاء.. خليها تجرب
معلش يا أمي سيبيها براحتها متجيش عليها، قالتلي تعرف لو كنت لسه متجوزتش ولقيت زيك مكنتش سيبتك والله يابنى انت خساره فيها اصلا دي حيوانه قولتلها لا خساره ولا حاجه سبيها ومتزعليهاش و لو لقيتها بتتكلم فى الموبيل سبيتها تكمل متجيش جنبها عشان خاطري نفذي اللى بقولك عليه
قفلت معاها وقعدت ع الكرسي ماسك القلم
و بشخبط على اي حاجه، ايدي بتكتب اسمها لوحدها، كل حاجه فيا رافضه تفكر غير فيها حتي صوابع ايدي..
"صوتك، الكلام معاكي" هما إللي علقوني بيك، بتخليني كل يوم ارجع في قرارى، عارف إن مش هينفع نكون غير أصحاب بس ده إختيارك مش إختياري..
إنتي ذنب أنا ارتكتبه في حق نفسي و حبيتك
من غير ما افكر أنا بالنسبالك ايه، و دلوقتي انا بدفع تمن كل حاجه، بدفع تمن كل إحساس حلو حسيته..
أنا عملت إيه في حياتي؟ هو طب، اعمل ايه بس؟؟ اسيبها ابعد؟ مش هقدر لالالاء... انا ماليش غيرها، طب اقول لمين اللي حاسه ويفهمني؟ ايه طيب؟ ومع الأيام وهي بتتعلق بيه أكتر و بتحبه أكتر،
و أنا واقف في مكاني لا قادر اتحرك ولا اتكلم واقف مكتفي بالسكوت، سايب الايام هي اللى تتكلم اتصلت قالتلي
انا حكيتله عنك وقولتله لازم يقعد معاك عشان في حاجات أنا صعب افهمهاله عني وانت احسن واحد هتعرف تفهمه وتخليه يفرحني
قولت حاضر، لو ده هيبسطك حاضر
بس هو ازاي وافق يقعد معايا؟ قالت هو معندوش مانع عشان بيحبني كده فى الاول رفض بس اقنعته يعنى.
قولتلها اه اقنعتيه؟ طيب قالت بكرا هخليكم
تقعدوا مع بعض بعد المحاضره ماشي؟ قولتلها حاضر، هعمل اي حاجه تفرحك قالت انت زعلان؟ ..ضحكتلها و من جوايا في نار بتاكل
الباقي مني، قولتلها لاء طبعا يابنتى، انتى مبسوطه خلاص انا مبسوط لانك اختي و فرحان بفرحتك ..
و تاني يوم قابلته وقعدت معاه وقالى هى قالتلي
لازم اقعد معاك عشان افهم وكده قولتله بعيداً عن اي حاجه متغيرش مني لان هي اختى فاهم؟
قال طبعاً انا مبغيرش منك عشان عارف طبيعة العلاقه اللي بينكم فمش في دماغي متخفش مش هروح لبعيد يعنى
و ضحك فبتسمتله قولت كويس قولت جوايا أنا لو في مكانك استحاله اخليها تقعد مع غيري استحاله اخليها تكلم غيري لإنها بتعتي،
اهم حاجه في حياتى، استحاله تكون بتحبها..
قولتله هى بتحب الايسكريم اوي و خصوصاً الشكولاته، هاتهولها ديماً و بتحب تفضل جنبها يعني لازم تتصل بيها على الاقل في اليوم 4 مرات
لو شوفتها مضايقه اتشقلب عشانها، متحاولش تسيبها تنام مضايقه
من اي حاجه "مش مهم منك او من غيرك" المهم متسيبهاش تنام مضايقه مهما حصل
ولما تلاقيها بتضحك اضحكلها واضحك اكتر زود على ضحكتها
ضحكتك هتلاقيها بتضحك اكتر، فرحها بكل كلمه بتقولها حسسها بموجودك معاها.. احضنها بكلامك، حسسها إن مهما ضاقت الدنيا بيها
هتلاقيك، متخليهاش تتوه منك في زحمة افكارها، خليك ديما الايد اللي لما تغرق تمسكها وتنقذها
هي رغايه شويا،لما تكون مبسوطه تلاقيها بتتكلم بسرعه
متعرفش بتقول ايه،سيبها تتكلم وتقول كل اللى نفسها فيه حسسها إنك مبسوط حتى لو مش فاهم
اصحي من النوم اتصل بيها اسمع صوتها و سمعها صوتك،
خليها تصحي علي صوتك تبدأ يومها بيك مش من غيرك، قرب منها اكتر بطريقه حلوه تخليها تحبك ..
متقولش ليها بحبك كتير والكلام ده، قولها اي كلمه تانيه غيرها معناها بحبك، ابتسم في وشها علي طول وخاف عليها اكتر من اى حاجه، خاف عليها..
متشربهاش بيبسي كتير عشان معدتها بتوجعها، متخليهاش تشرب اي حاجه قبل ما تاكل عشان معدتها حساسه شويا،
خليك دكتورها و حبيبها و و و لو لقيتها متعصبه و بتزعق سيبها متحاولش تقول كلمه تعصبها اكتر، سيبها هي هتهدي بس مش تسيبها وتمشي لاء، سيبها تخلص كل كلامها و ناقشها..
فاجئها بضحكتك،هتلاقيها استغربت بس هتضحك وناقشها براحه
سيبها تزعق تطلع اللي جواها بس
في وقت لازم تبقى شديد معاها تحسم الأمور بـ أه ولاء
سهل اوي إنك تتعامل معاها هي مش لغز ،
هي بس محتاجه تطمنلك و تحبك اكتر "اهتم،اسأل،اتكلم،حبها" هتلاقيها بتموت فيك اكتر.. حافظ عليها
وبعد ماخلصنا كلام، قالي حاسس إنك حافظها،
قولتله عشرة 6 سنين مش يوم او شهر او حتي سنه قولتله إنت كويس؟ قال اه وإنت قولتله "عايش و عادي
بعدها هي جات و قعدت معانا، عملت زي اول مرة قمت مشيت وسيبتهم يكملوا كلامهم وانا اروح اعمل اللى بعمله
اراقبهم من بعيد وابص عليها ..ومع مرور الأيام بقيت
بتتصل بيا تشكيلي منه و انا احاول اصلح ما بينهم وتقولي مش عارف يفهمني كل مره يغلط ويبعد والمفروض انا اصالح فيه قولتلها معلش ممكن يكون عنده ظروف، قالت مش بيتصل بيا الا مرة واحده و كمان ده ايه لما انا اللى اتصل بيه، قولتلها معلش استحملي شويا
وبدأت اصلح ما بينهم لما يتخانقوا، اكلمه واهدي فيه و ارجع اكلمها،
مش عاوز اشوفها زعلانه
و بعمل اى حاجه تبسطها حتي لو مش معايا، مش مهم.
مع الوقت لقيتها مش بتتصل بيا موبيلها مقفول طول اليوم، اتصلت بيها ع تليفون البيت قولتلها مالك؟
مش بتردي عليا ليه؟قالت هكلمك موبيل استني لقيت رقم غريب رديت لقتها هي، بتقولي انا اسفه بجد بس هو رافض اعرفك.. عاوزني ابعد عنك عشان بيغير منك عليا قولتلها مش فاهم فهمينى؟ قالت
بيغير عليا منك ومش عاوزك في حياتي و انا بصراحه عاوزه احافظ عليه متزعلش مني قولتلها انا معملتش حاجه دانا كنت بصلح ما بينكم لما تزعلو؟
قالت معلش خلينا بعيد عن بعض عشان
هو مرتاح كده و انا بصراحه مرتاحه من ساعة ما بعدت عنك و المشاكل ما بينا قلت و مبسوطه معاه كده
قولتلها يعني انا اللى كنت بعمل مشاكل؟
حتي دي كمان؟ حا..حاضـ.. حاضر ، ربنا يوقفك معاه قالتلي متزعلش قولتلها متخفيش انا اصلا معنديش دم ..
وقفلت معاها،، قعدت على الارض ابكى اكتر
ومن كتر الدموع مبقتش قادر اشوف بعيوني، اكن انا وحش؟ انا اللي بكرهم في بعض؟ بقيت بشوفها قدامي بعد ماكنا ماشيين جنب بعض طول اليوم فكل وقت، بقينا لما نشوف بعض نعمل نفسنا منعرفش بعض و بنكمل طريقنا وعايشين و عادي.. لكن بكتفي اشوفك من بعيد، بكتفي اشوف ضحكتك إللي وحشتني، بكتفي ابصلك و انتى بتضحكيله، بكتفي اعيش علي ملامحك، بكتفي ابصلك واسكت..
أنا عمري ما عملت حاجه في حد او جيت علي حد عشان يحصلي كل ده، عمري ماجرحت عشان أتجرح
مش فاهم ايه الحكمه في اللي بيحصلي ...
وبقيت كل ما اعدي من قدامها وهي قاعده بعد كل محاضره
اشوف في عيونها زعل ابصلها الاقي عيونها جات في عينى حاسسها عاوزه تتكلم معايا مش فاهم مالها ملامحها دبلانه، عمري ما تعود اشوف وردتي دبلانه، راحت لواحد مبيقدرش ولا بيفهم في الورد، راحت لواحد اهملها لحد ما دبلت وقفت جنبها و لسه هروح اكلمها كانت عاوزاني انا اللى اكلمها، لكن مشيت وكملت طريقي
كملت طريقي اللي كل خطوه فيه بتفكرني بيها و بضحكتها
" انا ماشيه جنبك أحترم نفسك، في يابنتي من حقي ابص ايه مزعلك؟، يعني مش عجباك انا؟، وصوت الضحك يعلي ويعدي حدود السما"...
"بطلي طفاسه بقي كلي براحه، هاتلي ايسكريم، مش عارفه انام تعبانه، بقولك لاء القميص ده احلي، بطل تمشي مع الولاد دول مش محترمين"
"إيه مميزات الشخص إللي نفسك تتجوزيه؟ يكون زيك، ربنا يخليك ليا انا بحبك اوي، يلا عشان توصلينى مش إنت الراجل بتاعي؟ يلا قدامي"
ماشي بفتكر كل تفاصيل حياتنا زمان، ماشي عايش علي كل ذكرياتنا، بفتكر كل حاجه بالدقيقه والثانيه واضحك ماشي و لأول مره اديها ضهري
سمعتها بتنادي عليا،(
وقفت لفيت وشي لقيتها هي واقفه عيونها مكسورة زي ما يكون محروجه مني، ابتسمت في وشها وقولتلها مالك زعلانه ليه؟ قالت
...
محتاجاك جنبي اوي الفترة دي، انا عارفه إن غلطت في حقك و جيت عليك و هانت عليا العشرة و جاية دلوقتي عاوزك تساعدني، أنا ماليش غيرك...
لقيتها بتعيط قولتلها ايه اللى بتعمليه ده انتى بتعيطي امسحي دموعك تعالي يلا عازمك علي ايسكريم، قالتلي تعرف من ساعه اخر مرة وانا مكلتوش
واخدتها جيبتلها الايسكريم اللي بتحبه واتمشينا ناكله انا وهي في البرد وقولتلها يلا احكيلي مالك كده براحه واحده واحده
وانا هساعدك ماشى؟ قالت ماشى بس اخلص الايسكريم قولتلها لسه طفسه زى مانتي عمرك ما هتتغيري، و بعد ما خلصت اكل و اديتها منديل تمسح بوقها المتلحوس قالت
مش بيكلمني غير لما يكون فاضي عكس ما كنت انت بتعمل، مش بيخليني احكيله كل تفاصيل يومي عكس ما كنت إنت بتعمل..مبقتش فاهماه خالص
بدل ما يجي يقعد جنبي ومعايا بلاقيه واقف مع بنات تانيه، فرحان بلمتهم حواليه، وكل ما اقوله احترمني، يقولي يابنتى دول زمايلي مش اكتر
لو شافني واقفه مع واحد مبيقولش ليا مين ده؟ مبيغيرش عليا مبقاش يحسسني بالغيره، مش لاقياه خالص،
حاسه إنه اتغير مليون درجه مش عرفاه قولتلها وكل ده ميساهلش إن ملامحك تدبل كده، قالت حاول تساعدني اتكلم معاه رجعهولي بحبه ومش عايزه اخسره ممكن؟ قولتلها ومن غير ممكن.. حاضر وانا بوصلها لقيت امها واقفه فالبلاكونه لما شافتني فرحت بقالها كتير مفيش حد بيوصلها أمها قالتلي اطلع و طلعت وبنتها دخلت اوضتها قالتلي
من ساعة ما الزفت ده دخل حياتها و انا مضايقه
في الاول كنت ببقي مطمنه انها هتروح و ترجع معاك لكن دلوقتي بقيت كل شويا اتصل و استناها قولتلها معلش كل حاجه هتتغير قالتلي ياريت قولتلها يلا انا همشي عشان اتاخرت ولما طلعت من اوضتها قربت منها وقولتلها اضحكي و متخافيش قالتلي قدام امها أنا عارفه انك احسن مني في كل حاجه حتي لما بعدت عنك طلعت برده احسن مني ولما احتجتلك جيتلي ومقولتش لاء وهتساعدني
قولتلها أنا مش بساعدك عشان أحسن منك او بكسر عينك، ابداً أنا بعمل كل ده عشان بحـ.. بحبك زي اختي امها بصتلي و اتحرجت و فتحت الباب و مشيت
مشيت رجعت البيت،تاني يوم روحت قعدت معاه وقولتله انت مزعلها ليه؟ قالي وانت مين قالك؟ قولتله باين عليها وهى قالتلي وقالتلك ايه كمان بقي؟
قولتله انا مفيش حاجه من جوايا ليها أنا اخوها افهم يابني و بعدين انا لو في حاجه هاجي ليك واقف قدامك عشان احاول اصالحكم على بعض من تانى؟
ياجدع افهم البنت دي بتحبك بلا تخسرها هو في حد لاقي حد يحبه فى الزمن ده؟؟ انت بتضيع كنز من ايدك مش عارف قيمتها الحقها أحسن ما تخسرها ..
وبدأت اهدي فيه و اعقله لحد ما بقي تمام و قولتله بلاش عشان خاطر اعز حاجه عندك بلاش تكسر بخاطرها او بنفسها، فرحها بقالها كتير مفرحتش
و اتفقت معاه إن بكره هاخدها من ايديها
و اوصلها لمكان هو فيه هيقعدوا في كافيه و يصالحها، واتصلت بيها بعد ما مشيت و خلصت كلام معاه
قولتلها ابسطي الواد بيحبك بس هو كان بيتقل شويا عليكي وبكرا محضرلك مفاجأه وقالي مقولش ليكى انا بكرا هاخدك من ايدك اوديكي لحد عنده
قالت ماشي و روحت عديت عليها لقيتها لابسه وقاعده مستنياني بقالها ساعه قولتلها ايه يابنتى رن و زن ماتهدي مش هيطير يلا بينا وروحنا
عدينا الطريق انا وهي وهو واقف مستنيها، قولتلهم انا هروح اقعد في الاستراحه ع الطريق التاني عشان لما تخلصوا وكده اخدها اروحها عشان أمها
و سبتهم و قعدت و عيني عليهم من بعيد
و هي قاعده مبسوطه و في لحظه سمعت صوت زعيق وجريت على هناك اشوف مالهم في ايه لمو الناس عليهم
لقيتها منهاره من العياط وبتقول طلع متجوز عرفي
و عماله تعيط، بسيطله وعاوز اضربه، مش هينفع مش هقدر الومه لإنها هي اللى عملت في نفسها كده
جريت من قدامي و بتعدي الطريق بجري وراها عشان اهديها و انا بعدي الطريق لحقتها واخدتها وفضلت تعيط اخدتها من ايدها و اتمشينا شويا
وحاولت اهدي فيها لحد ما بطلت عياط
و فضلت معاها طول الفتره دي عشان متحسش إنها لوحدها متحسش إن مفيش حد معاها فضلت جنبها وبقيت بستأذن امها اخدها امشيها شويا اخلليها تغير جو عشان متفضلش قاعده لوحدها عشان متفكرش فيه و تزعل بحاول اعمل مسح شامل لذكرياتها معاه
وفي يوم واحنا خارجين قالتلي أنا مبسوطه إنك معايا
اوي بتحاول تفرحنى حتي و انا باجي عليك في كل مره بلاقيك جنبي و فرحان حتي لو مزعلاك تعرف أنا فرحانه اوي بوجودك في حياتي، كل حاجه بشوفها حلوه في وجوك، بتعمل اي حاجه مهما كانت عشان تفرحني...
إنت مفيش منك غيرك قولتلها و انا مش عاوز اي حاجه غير إني اشوفك مبسوطه و فرحانه، انا عمري ما بصيت لنفسي ديما ببصلك إنتي، عشان كل حاجه حلوه في حياتى
مش عاوز منك حاجه ولا بفتش جواكي علي مقابل لأي حاجه بعملها، أنا بـ..بعزك اوي ومش عاوزك تزعلي علي اي حاجه، مفيش حاجه تستاهل أساساً مش عشان تجربه مريتي بيها يبقي الكل وحش، في ناس كتير حلوه حواليكي بس إنتي اللى مغميه عنيكى، افتحي عيونك و بصي هتلاقي كتير اوى مستنينك..
إللي بيحب حد بيسعده، مش ضروري يحب فيه كل حاجه عشان يبقي بيحبه، ممكن من حاجه بسيطه يعشقه و يقرب منه ويفضل جنبه طول حياته
أنا ممكن أقولك "بحبك، بعشقك، بهواك" بس ده كلام و في الاخر واستناك تلف و اديك على قفاك، الفكره إن الحب تصرفات و عمره ما كان بكلمه بحبك
إحنا بنقول كلمه "بحبك" عشان نعرف إللي قدامنا إن احنا بنحبه لكن بعدها بتبدأ تثبت حبك ده، تثبت إنك صادق في كلامك مش خالف لوعدك و كداب
ومش كل من قال كلمه نصدقه، ومش كل من قال شوية كلام حلوين نفرح بيهم إحنا محتاجين إثبات لكل كلمه، محتاجين أفعال تأكد كل كلمه اتقالت
"الحياه مش هتوقف علي تجربه في حياتك
ياما ناس عاشت تجارب "اتحبت، سابت، حبت، اتسابت" ودي مش نهاية الحياه لإن إحنا عايشين نتعلم
متخليش حاجه مهما كانت صغيره تزعلك إنسى الزعل و أفرح،
أفرح و عيش اليوم أكنه أخر يوم في حياتك .. و إنسي النكد لو ليوم واحد في حياتك
بصيتلي و عنيها بتضحك و بتقولي نفسي ارجع صغيره، أرجع لأول يوم فيه عرفنا بعض أرجع اشيل شنطتي المليانه كتب ونمشى نضحك جنب بعض
قولتلها بس كده؟ مسكتها من اديها وبقولها سبيلي نفسك قالتلي هنروح فين سبينى قاعده قولتلها طيب برحتك و أنا بتحرك و بجري قدامها على الرصيف
عربيه خبطتني لقيتها بتصوت و بتجري عليا تلحقني و الناس بتتلم عليا و هي بتصرخ و بتصوت في ايه؟ في ايه؟ و السواق نزل من العربيه
قومت وقفت عادي مفيش حاجه مالكم ياجماعه انا كويس، ببص لقيتها بتجري علي حاجه جنبي بلف وشي لقتني نايم على الارض مبتحركش نايم..
عماله تصرخ و تهز فيا عشان اقوم بقولها مالك انا كويس اهو مين ده؟ امال انا ايه؟ في ايه ؟ شالو جثتي و راحوا علي المستشفى وانا راكب جنبها
و هي بتتصل بأمها تقولها الحقيني عمل حدثه وشكله مات ياماما و انا عمال اضحك مين اللى مات يابنتى بس انا اهو عايش قدامك مفيش موت ولا حاجه
نيموني على سريرى و أنا قاعد جنبي، ببص عليها داخله عليا بتبص ليا وبتعيط وبتبص على جدران الاوضه صورنا مغطيه الجدران و هي بتضحك وهى بتاكل
وفي كل مكان صوره بصيت و لقيت على خشب سريري ناحت أسمها و أسمي، فضلت تعيط و انا قاعد جنبها مش عارف اتكلم بكلمها مش سمعاني
أنا بقيت وهم او ذكري في حياتها، بقيت حاجه تفتكرها وتضحك، حياتي وقفت معاها لحد هنا وقفت لحد المقابر وهما شايليني و رايح قبري
واقف جنبها وهما بيدفنوني و هي بتعيط عليا و انا واقف ابصلها وفرحان بيها، وعمري ما فكرت إن هيجي يوم ونفترق و ببصلها و عاوز احضنها
قولتلها في ودنها وهي واقفه مستنكي تيجي تزوريني كل يوم زي ما كنتي بتجي تصحينى من النوم.. مستنيكي متتأخريش، هتلاقيني قاعدلك على قبري
فهمت حاجه؟ قالي يعني حتي وانت ميت لسه بتحبها؟ طب هي حلوه؟ قولتله اسأل اللي نايم في قبره إللي قدامك شافها بعد موتي بأسبوع كانت بتزورني
لقيت واحد نايم في القبر اللى جنبي قال انت مش ناوي تنام بقي؟ مش كل ما ميت جديد يجي تقعد تحكيله حكايتك من اول ما شوفتها وتصدعنا معاك
قولتله فيها ايه يعني لما احكي؟ قال ما احنا حفظنا قصتك دي، نوع شويا شوف اي حاجه غيرها مش كل ما واحد جديد يجي تحكيله نفس القصه، قولتله
واقف جنبها وهما بيدفنوني و هي بتعيط عليا و انا واقف ابصلها وفرحان بيها، وعمري ما فكرت إن هيجي يوم ونفترق و ببصلها و عاوز احضنها
قولتلها في ودنها وهي واقفه مستنكي تيجي تزوريني كل يوم زي ما كنتي بتجي تصحينى من النوم.. مستنيكي متتأخريش، هتلاقيني قاعدلك على قبري
فهمت حاجه؟ قالي يعني حتي وانت ميت لسه بتحبها؟ طب هي حلوه؟ قولتله اسأل اللي نايم في قبره إللي قدامك شافها بعد موتي بأسبوع كانت بتزورني
لقيت واحد نايم في القبر اللى جنبي قال انت مش ناوي تنام بقي؟ مش كل ما ميت جديد يجي تقعد تحكيله حكايتك من اول ما شوفتها وتصدعنا معاك
قولتله فيها ايه يعني لما احكي؟ قال ما احنا حفظنا قصتك دي، نوع شويا شوف اي حاجه غيرها مش كل ما واحد جديد يجي تحكيله نفس القصه،
تمت ياريت تقولوا رإيكم :)
ليست هناك تعليقات:
إرسال تعليق